سلام الله عليكم ورحمته وبركاته..

أخباركم ايه يا اهلى وناسى.. يا أغلى من فرشتى ومداسى..
النهاردة لازمان ولابد اكلمكم عن أهم حاجة حاصلة فى يومينكم..

النهاردة كام؟ حد قال 9 مارس؟ يا ماشاء الله عليك.. فارس..
يعنى باقى من الزمن سبع ايام.. ويعملها فيكم اللئيم ابن اللئام..
عارفينه؟ ولا أقول واشرح.. أيوة هوا بعينه اللى سايقكم فى أكبر مسرح..
قالوا عنه خنزير وابن العم قالوا.. هوا جاركم اللى مربيكم.. زعلتكم الكلمة؟ طب ومالو..

قال هوا إيه؟ الحرم الإبراهيمى.. تراثنا من ايام جد جدى وحيات قرشى ومليمى..
قولت أنا............ ولا بلاش.. لاحسن يقول عليا نزهى ونتاش..
ماهو دا اللى احنا فالحين فيه.. نعمل ستين سبع برمبة.. واحنا اضعف من ان حتى ضعفنا نداريه..
فينكم يا رجالة.. ولا على رأى اللى قال خلصتو فى تلاتة وسبعين.. مفضلش منكم غيرى.. وغيرىألاقى مين؟

انتو سكتو كتير وجبنتم وريحتكم فاحت.. مش جه وقت الكلام؟ ولا خلاص الـ -لامؤاخذة- راحت؟؟

وتانى أرجع أقول يفيد فى ايه الكلام.. خلص وقته من زمن، وياحسرتى على اللى من خيبته دخل استغطى ونام.....

انتا يمكن لسة مش فاهمين.. يمكن لسة صغيرين..
أقولكو؟ تشربو شاى؟

وبرضو نقول

السلام مسك الختام

قعدة صفا .... 1

تعالو بقا أما أكلمكم شوبة عن شوية حاجات مهمة أوى أوى

تعا يابنى انتا وهوا وهوا أقعدو قصادى هنا.. وانتى يابنتى انتى وهيا وهيا.. لا قصادى ايه؟ تعالو هنا جنب عمدتكو

النهاردة هحكيلكم عن جدنا الكفراوى الكبير.. مؤسس الكفر دا.. جدنا دا موجود فى الخيال بس.. لسة مجاش الواقع.. بس يمكن ييجى

ونبدأ الحكاية

كان يا ماكان يا واد يا حسين ويا بت يا إحسان.. كان فى زمان راجل.. أيوة "راجل" ..جدع فوق الوصف.. شهامة إيه، أخلاق إيه، ذوق إيه.. متربى على قديمو زى مابتقولو انتو ياولاد اليومين دول

الجدع دا كان إسمه الريس عز.. وكان عزيز عز.. متفرقوش عن ولاد الذوات.. مش بكتر ماله.. لا دا كان يا ولداه حيلته جلابيته وطاقيته... وستر ربه وعافيته.. مكانش يخاف من كلمة حق.. ولو على رقبته.. مكانش حد يقدر يكسر عينه.. وإلا كان كسر رقبته

كان فتوة على حق.. يتفتون عالمفترى ويعرفه قيمته.. يعرفه انه ميسواش تلاتة تعريفة.. والمظلوم الغلبان.. يديله دراعه القوى.. بدل إيديه المتكتفة الضعيفة

الكل كان يخافه.. مش لإنه فتوة.. إنما لأنه ليه هيبة وراها قوة.. كان يشوف الغلطان يغلط.. وميقولوش انتا غلطان.. كان يصلح الغلط ويعلمه بالفعل، مش بطولة اللسان

مكانش يهمه حد غير رب كريم.. خلقه وانعم عليه بالعقل والتصميم.. كان يشق الصخر.. ويهد الجبال.. مكانش يبعد عنه شئ.. مكانش يعرف كلمة محال

طول ماهوا عالحق.. لا يهمه ملك ولا وزير ولا عسكر.. كان يعمل الصح.. ويحكم بالعدل والميزان.. كان راجل سكر

مهما هقول وأعيد الكلام أكتر من القوالة والإعادة.. خلاصة القول، كان أسد، غضنفر مجابتهوش ولادة

ييجى حد بقا يسألنى واحنا مالنا بالكلام دا كله.. وكمان بتقولنا انه خيال مكانش ولا كان حتى ضله

أقوله أنا بقا عفارم عليك.. هوا دا السؤال يسلم الفم اللى نطق وقال.. الراجل دا آه محصلش بس عشمى أشوفه بينكم موجود

 الكفر أنا جبتهولكم.. على طبق من فضة وحطتهولكم.. وكمان عملت نفسى عمدة عشان احرسه وأصونهولكم.. بس حذارى حذارى.. من أمر ربانى.. بين يوم وليلة متلاقونيش بعده تانى.. الراجل دا آه محصلش.. بس لازمان ولابد يكون موجود.. وإلا بين يوم وليلة، تلاقو الحال أسوأ مما كان يعود..

أنا عارف إن كلامى كله عليكو غريب.. بس زمان قالو بالإشارة فهم اللبيب

واللى فيكو مش لبيب..... أقولكو.. تشربو شاى؟

ومن تانى نقول

السلام ختام

فرمان العمدة رقم 1

بسم الله الرحمن الرحيم

باسم الوطن

وباسم الشعب

أعلن أنا عمدة كفر مصر الجديد.. تأميم كفر مصر.. كفر مصريين مصر

يا أهالى الكفر دى مش نكتة ولا اشتغالة.. أنا العمدة يعنى كبير ع الكلام المحفلط بتاعكم ده

من هنا ورايح مفيش حد يتكلم غيرى.. واللى مزنوق أوى فى الكلمتين يتكلم على جنب.. قصدى يرفع صباعه وأنا اللى أقوله قول.. يقوم يقول على طول

من هنا ورايح فى نظام.. فى سياسة وفى ساسة.. أهل العلم والمعرفة (اللى هما العبد لله طبعا) بس هما اللى يفهمو فيها.. دا كلام كبير عليكو

إحنا هنا مش بنهزر.. يعنى اللى شايف نفسه فاضى وجاى يقضيله ساعتين.. أحب أقولك انهم هيبقو ساعتين قطران على دماغك.. جاى تهزر تتفضل تورينا عرض كتافك

وكمان هنا محناش بنخاف ولا نحب اللى يخاف.. لو جيت هنا وانتا خواف وعارف انك خواف.. أحب أقولك إنك هتشوف معانا أيام أسود من قرن الخروب.. بتخاف تتفضل تورينا عرض كتافك

هنا الكلام كله كلام موزون وعالى أوى (طبعا، مش جنابى اللى بيقوله؟).. يعنى لو انتا تافه ودماغك تافهة شبهك.. أظن انتا عارف.. أنا مبرحمش.. هطلع عينك وعين اللى خلفوك.. تافه وعارف انك تافه.. تتفضل تورينا عرض كتافك

إنتا آه مواطن، والمواطن حقه مكفول، بس تخرج عن حدودك.. أخليك تبات تحت اللحاف بردان.. هتخرج عن حدودك.. هااااااااااا

واوعو تقلقو أو تتكسفو منى.. لالالالالالالالا.. دانا جناب العمدة بتاعكو.. يعنى أنا اللى حاميكو وجايبلكو حقوقكو.. أنا اللى مأكلكم ومشربكم وملبسكم ومحميكم ومنيمكم و......... أكيد انتو عارفين.. خيرى مغرقكم من كبيركم لصغيركم.. أنا أصلى مش بحب أتكلم عن نفسى كتير

وعشان أنا مبحبش أتكلم عن نفسى كتير.. إيه نفسك دى يا ولد؟! أنا بس اللى أقول نفسى.. إنتا تقول نفس جنابك!.. دانا العمدة.. كنا بنقول إيه؟.. ايوة افتكرت مبحبش أتكلم عن نفسى جنابى كتير.. فقررت أكلمكم عن كفرنا.. بعد ما أممناه

كفرنا دا بتاعنا احنا.. الناس التانيين لا.. أظن عارفينهم، ولا إيه؟.. يعنى اللى منكم يشوف خيال كلب منهم، يرميه برة

كفرنا دا أهم منى ومنكو ومن هم ومن أى حد تانى على وجه البسيطة.. يعنى من غير كلكعة كدا، كفرنا مصلحته أولا.. نفر نفر فيكم فداه.. بالذوق بالعافية فداه.. بمزاجكو غصب عن أهاليكو فداه.. بالرضا بالاقتدار، برضو فداه

الكفر دا أنا (جنابى يعنى منك له لها لها له) شقيت عشان أخليه بتاعكو.. اللى يستجرى يضيع شقايا.. لا يضيع ايه.. اللى يستجرى يفكر انه يضيع شقايا.. لا برضو يفكر ايه.. اللى منكو يستجرى ييجى على باله كدا خيال فكرة انه يفكر تفكير يضيع شقايا.. ياويله يا سواد ليله على يدى.. الغفر دول هنا لحمايتكم.. حمايتكم حتى من نفسكم.. فاهمنى ولا؟؟؟

أقولكو ع الموضوع ببساطة؟

من هنا ورايح.. احنا هنا هنتكلم وبس.. نفضفض وبس.. نسمع وبس.. وانتو هنا فى حمايا.. يعنى محدش يقدر يستجرى يفكر يهوب هنا عشان يمنع واحد كفراوى بلدياتنا من انه يتكلم

الدوار دا دواركم انتم.. وبابه مفتوح يوماتى عشانكم انتم.. تشربو شاى؟؟

والسلام ختام